இன்று பிரதோஷ நன்னாள்.
திருச்சிற்றம்பலம்
<> எது தவம்? <>
உம்பர் உலகை அடைவனென
.. உஞற்றும் தவமும் உலகுதரும்
இன்பம் பலவும் பெறுதற்கென்(று)
.. இயற்றும் தவமும் தவமல்ல
துன்பம் மலிந்த பிறப்பிறப்புச்
... சுழலை விடுத்துக் கதியடையச்
செம்பொற் சுடராய்த் திகழ்வோன்தாள்
.. தேடல் ஒன்றே தவமாமே.
தவத்தின் உண்மைப் பயனடைந்தோர்
..தம்முள் உறையும் பரமறிவார்
அவத்தை விழிப்பு கனவுள்ளும்
.. ஆழ்ந்த சுழுத்தி அதனுள்ளும்
சிவத்தி னின்று தாமகலாச்
.. சித்தில் நிலைப்பார் சுழன்றுவரும்
பவத்தை வென்றோர் அவர்பெருமை
.. சாற்றல் எவர்க்கே சாத்தியமே.
கோவணம் தரித்துப் பெருந்துன்பம்
.. கொளினும் உடலைக் குறியாது
யாவரும் வியக்க அருணையிலே
.. அமர்ந்த முனிவர் ஆர்நானென்(று)
ஓவா துள்ளே தேடெனவே
.. உபதே சித்து வானுறையும்
தேவரும் அறியா அறிவொளியில்
... திளைத்தார் அதுமெய்த் தவமாமே.
... அனந்த் 1-12-2017
