திருச்சிற்றம்பலம்
நடுநிலை காப்போன்
விட்டுக் கொடுத்தாய் இடப்பாகம்
…..விளங்கும்உமையாள் தனக்குப்பின்
கட்டுக் கடங்காது ஓடிவந்த
……கங்கைப் பெண்ணைச் சடையில்வலம்
இட்டவ் விருவர் தம்மையுமே
....இணையாய் வைத்த சமர்த்தைப்போல்
நட்டம் தனிலும் கால்மாற்றி
…..நாத! அவரை நயந்தனையோ?
*
திட்டம் எதுவாய் இருப்பினுமிச்
…..சிறியேன் தில்லை, மதுரையிலே
கிட்ட இருந்துன் நடம்காணக்
…..கிருபை செய்தாய்; பிறப்பிறப்பாம்
வட்டச் சகடம் தனில்பட்டு
…..வாடா வகைஉன் அடியவர்க்குக்
கிட்டும் எனும்மே லோர்சொல்லைக்
…..காத்தல் உன்றன் கடன்,ஐயே!
சமர்த்து= பலம், ஆற்றல்; நயத்தல் = இங்கு, மதித்தல், நீதிசெய்தல் (க. அகராதி; பிற பொருள்கள்:ஆசைப்பெருக்கம், சினேகித்தல், பின்செல்லுதல்,விரும்பல்)
அனந்த்
24-3-2013
குறிப்பு:முதல் பகுதியில், உமையன்னையைத் தமது இடப்பக்கத்திலும் கங்கையன்னைத் தமது வலது பக்கத்திலும் சிவபெருமான் வைத்துள்ளதை, அவர் தில்லையில் இடது தாளையும் மதுரையில் (ராஜசேகர பாண்டியனுக்காக) வலது காலையும் தூக்கி (கால்மாற்றி) ஆடிய நிகழ்ச்சியோடு இணைத்தது தற்குறிப்பேற்றம்.
