இன்று மஹாசிவராத்திரிக்கு முந்திய சனிப்பிரதோஷச் சிறப்பு நன்னாள்.
<> இசைதல் வேண்டும் <>
திருச்சிற்றம்பலம்
குப்பை மலிந்த என்நெஞ்சக்
... குடிலில் குறைகள் பலவுண்டு
......கொடுமை புரியும் அறுவருண்டு*
.........குடிகொள் அதனுள் நீஎன்னல்
தப்பென் றறிவேன் எனினுமொரு
...தந்தை மைந்தன் அகந்தன்னில்
…..தங்க மறுத்தல் அழகாமோ?
.........தயைசெய்(து)என்றன் அழைப்பினையேற்(று)
எப்போ தும்மென் னுள்ளிருக்க
...இசைதல் வேண்டும் உன்திறன்முன்
….இல்லத் துறையும் பகையொடுமற்(று)
.........எல்லாத் துன்பும் அகலும்ஐயே!
வெப்பம் அறியா வெற்பமரும்
...விமலா!விதியோ(டு)அரியறியா
......விகிர்தா!என்னைக் காத்தருள
.........விரைந்து வருகை தருவாயே!
அனந்த் 9-3-2013
*ஆறு பகைவர்கள்: காமம், கோபம், கருமித்தனம்(லோபம்), மோகம், ஆணவம்(மதம்), பொறாமை(மாச்சர்யம்) என்னும் தீயகுணங்கள்.; விதி = பிரமன்
யாப்பு: பன்னிருசீர் ஆசிரிய விருத்தம்; அரையடி: மா மா காய் மா மா காய்; அடிமுதற்சீர்: தேமா.
No comments:
Post a Comment