திருச்சிற்றம்பலம்
<> கனலை எரிக்கும் புனல் <>
உணர்வினில் ஊறி உள்ளமெலாம்
...உன்நினை வொன்றே நிலைத்திருக்கும்
....உத்தமர் உறவில் மகிழ்ந்திருக்கும்
......உமையவள் பாகா! உன்விழிகள்
கணந்தொறும் தோன்றும் எண்ணங்கள்
..கனலெனக் கொடியேன் நெஞ்சகத்தைக்
...கருகிட வைக்கும் காட்சியினைக்
....கண்டிடா திருத்தல் முறை,எனினும்
அணங்கினைச் சடையில் அணிந்திடுவோய்!
..அலைபுரள் புனலின் ஓர்துளியால்
...அடியனின் துயரை எரித்தழித்தல்
....அரிதென ஆமோ? அரிஅயன்முன்
தணலொளிப் பிழம்பாய் நீண்டவனே
..சழக்கனென்(று) உதறா தருள்செய்தல்
...சாத்திய மாகா ஒருசெயலோ?
........சரணடைந் தோரைப் புரப்பவனே!
... அனந்த் 12-2-2014
No comments:
Post a Comment