குடி கொண்டதுவே

இன்று சனிப் பிரதோஷச் சிறப்பு நன்னாள்.

                      திருச்சிற்றம்பலம்

                

             

      <> குடி கொண்டதுவே <>

பஞ்சினின் மென்தாள் பாவையொடு

.. பரமன் பனிவரை மீதினிலே

குஞ்சர முகத்தோன் குமரனுடன்

.. கூடி நடத்திடும் குடித்தனத்தை 

நெஞ்சினில் இருத்த நினைத்தேன்நான்

.. நிகழ்ந்த தேதென அறிவீரோ? 

தஞ்சமென் றெனது நெஞ்சமவன்

.. தாளின் கீழ்குடி கொண்டதுவே!

                

                        ****

தாடரும் தண்மை இதத்தினிலே

.. தாபம் தணிந்தவென் நெஞ்சினிலே

ஆடிடக் கண்டேன் அரன்குடும்பம்

..  அனைத்தும் அவனுடன் சேர்ந்(து)அந்த

நாடகம்  அதனின் அழகையென்னால்

.. நவிலல் எங்ஙனம்? அவருடனே

கூடியென் நெஞ்சும் குதித்திடக்கை

.. கூடும் நாள்வரக் காத்திருப்பேன்.

(தாடரும் = தாள்தரும்)

                        ****

நாடொறும் இந்த வகையாக

.. நானென் நனவிலும் கனவிலுமாய்

ஆடலின் அரசே! உன்னைநினைத்(து)

.. அரற்றல் கண்டினி மேலுமிங்ஙன்

வாடிட லாகா வழியொன்றை

.. வகுத்தல் எளி(து)இனி வெளியிலுனைத்

தேடிட வேண்டா(து) என்னுள்ளே

.. திகழும் உன்னுரு தெரியவைப்பாய்.

                          ****

                                         ..அனந்த் 5-8-2017