பேசா ஈசன்

                                                திருச்சிற்றம்பலம்

 

   

                                <> பேசா ஈசன் <>

அகிலமெலாம் படைத்திடுவாய் ஆனால்ஓர் ஆண்டியெனத்

துகிலின்றி உலவிடுவாய் சோர்வில்லா(து) ஊணிரப்பாய்

புகலொருகா ரணமென்றால் போயாங்கோர் மரத்தின்கீழ்ச்

சுகமாக அமர்ந்தொருசொல் பேசாமல் அமர்ந்திடுவாய்

அமரருனை அன்றொருநாள் அச்சத்தோ(டு) அணுகிநிற்க

அமைதிதிகழ் வதனமொடு அருந்தினையோர் கொடியவிடம்

தமதிடரைத் தீர்த்தஉனைத் தியாகேச னெனத்துதிக்க

உமைபுரிந்த உதவியைநீ உலகறியக் கூறிலையே.

பேசா திருப்பதிலே பெருத்தபயன் உண்டெனவே

ஈசாநீ கண்டபினர் இச்சகத்தார் தம்மிடரை

நாசஞ்செய் திடுவையென நம்பியுன்பால் வருகையிலே

வேசமொன்றைப் பூணுவைநீ வெறுங்கல் சிலையென்றே.

அனந்த் 13/14-6-2019  பிரதோஷம்