பித்தைத் தருவாய்

திருச்சிற்றம்பலம்

<> பித்தைத் தருவாய் <>  

பித்தனென் பார்உன்னைப் பேயனென்பார் – உன்மேல்

.. பித்தெனக்(கு) ஈயாயோ?

சித்தத்தில் நீயிருந்தால் – வேறு

.. சித்திகள் வேண்டுவனோ?

அத்தனுன் போலிருந்தால் – அதனின்

… ஆனந்தம் வேறுமுண்டோ?                     (…பித்தனென்பார்)

புத்தியில் நீபுகுந்தால் – நானும்

.. பூரணம் ஆகிடுவேன்

மொத்தமும் நான்என்னும் – உணர்வுள்

… மூழ்கி அமிழ்ந்திடுவேன்                         

அத்தனை அண்டங்களும் – என்றன்

.. அகத்தினுள் ளேயடங்கும் 

வித்துக்குள் ளேமரம்போய் – மறையும்

.. விந்தை நிகழ்ந்துவிடும்.                        (…பித்தனென்பார்)

எத்தை நினைப்பதற்கும் – நெஞ்சில்

.. எண்ணம் இருக்காது

சத்தெனும் ஒன்றில்உறை – மெய்யாம்

.. தத்துவம் நானாவேன்                         

சித்துப் பெருவெளியில் – ஆடும்

.. செல்வனுன் ஆட்டத்துள்ளே

சத்தமெல் லாமடங்கி – மௌன

.. சாகரத் துள்அமிழ்வேன்.                        (…பித்தனென்பார்)

அனந்த்  5-4-2020 சோமவாரப் பிரதோஷம்
ஒலிப்பதிவு: https://drive.google.com/file/d/1ZKxQdgA_xcGzhJyL7nXFCn9hkQO7MiwA/view?usp=sharing