திருச்சிற்றம்பலம்

                 <> அறிகிலனே <>

 
ஏதும் அறியா ஈனனை ஈர்த்துன்னைக் காணவொரு

பாதை  அமைத்தாய் பாராமல் நானெங்கும் திரிகையிலே

ஈதே  வழியென் றியம்பி எனைக்கூட்டிச் சென்றாங்கே

ஏது(ம்) மொழியா திருந்ததனை ஏனெனயான் அறிகிலனே.

                              

                   <> நடிப்பதேன்? <>

      

போது சடையணி பொன்னம் பலத்தரசே

ஏது குறையுமக்கென் றிவ்வாறுஎப் – போதுமொரு

காலை மடக்கிநின்று கட்டப் படுவதுபோல்

நாலுபேர் முன்னால் நடிப்பு? 

..... அனந்த் 19-6-2024

உன்னருள் திறம்

இன்று பிரதோஷ நன்னாள் 

திருச்சிற்றம்பலம்

                      <> உன்னருள் திறம் <> 

         

​

சதுராடும் ஐய!உனைச் சாருமடி யார்பால்

எதிர்பார்க்கும் நற்குணங்கள் ஏதும் – பதரனையேற்(கு)

இன்றென் றறிந்துமெனை ஏற்றாய் இதற்கெங்ஙன்

நன்றி நவில்வேனோ நான்.

                 

                   

​

சேற்றில் விழுந்து கிடந்தேனைத் தில்லைத் தேவே நீஇரங்கி

ஊற்றுக் கோல்தந் துதவியுன்தாள் உறுமா றிட்டாய் உன்னருளை

ஏற்கத் தகுதி இல்லேனுக் கிங்ஙன் இரங்கும் ஈச!உன்போல்  

வேற்றோர் தெய்வம் மேதினியில் உண்டோ விளம்பற் கறியேனே.

                           

…அனந்த் 4-6-2024