படைத்ததேன்?

திருச்சிற்றம்பலம்

​

<> படைத்ததேன்? <>

பூவும் இலையும் உன்முடியில்

... புனிதம் அடையும் புற்றரவம்

தாவி உன்றன் மேனியினைச்

.. சார்ந்து பிறந்த பயனெய்தும்

நாவும் செவியும் பெற்றுமுன்பேர்

.. நவின்றோ கேட்டோ உனையடையாப்

பாவி யாய்நான் வாழ்வதற்கோ

.. படைத்தாய் என்னைப் பரமேசா?

..அனந்த்  31-1-2015

பேறு வழங்குவாய்

திருச்சிற்றம்பலம்

​

<> பேறு வழங்குவாய் <>

புலன்தரும் போகம் பொருட்டாய் மதியாத புத்தியையும்

நலம்குறைந்(து) ஆகம் நலியினும் உன்பேர் நவில்திறனும்

புலம்பெயர்ந் தாலுமெப் போதும்உன் சீரைப் புகழ்ந்துதளி

வலம்வரும் பேறும் வழங்கிடு வாய்தில்லை வாழரசே!

(ஆகம் = உடல்; தளி = கோயில்)

அனந்த்  18-1-2015 

கண்ணீரில் கரைந்த வினை

திருச்சிற்றம்பலம்

<> கண்ணீரில் கரைந்த வினை <>

​

அன்னே! நீஎன் அகம்புகுந்துஅங்(கு)

.. அனலைக் கிளப்பி அதன்நடுவில்

முன்னே புரிந்த வினையெல்லாம்

... முற்றும் எரித்தென் முகத்திழியும்

கண்ணீ ரதனில் கரைத்துவிட்டாய்

... காலம் கடந்தேன் கனகசபை

மின்னே! வரையில் பெருவெளியில்

... விளங்கும் பரமே! மெய்யுணர்வே!

(வரையில் = வரை (அளவு) இல்லாத)

அனந்த் 13-1-2015

வேடம் புனைவீர்

திருச்சிற்றம்பலம் 

​

<> வேடம் புனைவீர் <>

ஓரொருகால் ஊரரெல்லாம் ஓடேந்தி இரந்துண்பீர்

வேறொருகால் கூடலில்நீர் வீறுடனே வேந்தனெனச்

சீரொளிரும் முடியணிவீர்; சிறுபொழுதில், இரந்துண்ணப் 

பாரெல்லாம் திகம்பரனாய்ப் பகற்பொழுதில் சென்(று)இரவில்

யாருமிலாக் காட்டினிலே ஆடிடுவீர், பின்னர்மர

வேரடியில் வாய்மூடி வீற்றிருப்பீர் ஐய!உமை

ஓருருவில் நான்துதிக்க வொட்டீரென்(று) எண்ணுகையில்

யாருமறி யாதென்றன் அகத்துள்நிலை கொண்டிடுவீர்!

அனந்த் 2-1-2015

இணைத்துள்ள ஓவியம், கவிஞர் சு.ரவி வரைந்தது.