உன் பாடு

                        திருச்சிற்றம்பலம்

                      <> உன் பாடு <>

நீதி பயிலாத நீசன்என்மேற் கோபமுறல்

நாத! நியாயம் நினக்காமோ? – ஏதம்விளை

யாதுநான் செய்யினும் ஆங்கதனை ஏற்றுன்றன்

பாதம் வழங்கல்உன் பாடு.

ஏதம் புரிவோர் அதன்விளைவை ஏற்றலே

நீதியாம் என்றொருகால் நீவிளம்பின் – வாதிற்கு

வாதவூர் ஐயனின் வாக்கை*யான் காட்டியுன்றன்

பாத(ம்)விழு வேன்பின்னுன் பாடு!

(”நன்றே செய்வாய் பிழைசெய்வாய் நானோ இதற்கு நாயகமே?” திருவாசகம்)

என்ன முயன்றும் எனக்கடங்கா தென்றனுக்(கு)

இன்னல் விளைக்கும் இராக்கதனாம் – என்மனத்தை

உன்னிடத்தில் ஒப்புவித்தேன் இன்றே இனிமேலே

உன்பா(டு) அதன்பாடு காண்.

நீர்விலக்கிப்  பாலருந்தும் அன்னம் அனையதொரு

நீர்மையோய் நீயென்றன் நெஞ்சிலுள்ள – ஓர்துளி

அன்பெனும் பாலுடன் ஆழிநீ ராய்க்கலந்த

புன்மையெலாம் நீக்கிப் பருகு.

பாடும் அடியார்தம் பாட்டை அறிந்தவர்

நாடும் அனைத்தையும் நல்கிடுவோய் – பீடுமிகு

பெம்மான் உனைஎளியேன் பேசத் தகுதியிலேன்

சும்மா இருந்திடச் செய்.

அனந்த் 16-3-2019 பிரதோஷம்
படம்: குற்றாலம் சித்திரசபையின் சுவர்களில் காணும் படங்களில் ஒன்று.