திருச்சிற்றம்பலம்

<> பாராயோ? <>

காப்பாய் என்றோர் கணம்தோன்றும்

.. களிப்பேன், சிரிப்பேன் கூத்திடுவேன்

தீப்போல் உடனே செய்வினைகள்

.. திரும்பி என்றன் நிலைகுலைக்கும்

மீட்பாய் என்று மீண்டுமொரு

.. வேட்கை எழுமிங் ஙனம்நிதமும்

மாய்ப்பும் பிறப்பு மாயலைந்து

.. வாழும் அவலம் தீராயோ?

(மாய்ப்பு = மாய்தல், சிவனை எண்ணாப் போதுகள் இறப்பையும் எண்ணுங் காலம் பிறப்பையும் ஒக்கும் என்றவாறு)

         *<>*<>*

பொல்லேன் யானென் றுனக்கெவரும்

… புகலல் வேண்டா என்பிழைகள்

எல்லாம் அறிவாய் என்னிறையே

… இனிநீ செய்ய ஒன்றுண்டு

கல்லைக் கனியாய் மாற்றுமுன்றன்

.. கடைக்கண் நுனியை அடியேன்பால்

தில்லைப் பதியோய்! ஒருகணம்நீ

… திருப்பின் சிறியேன் திருந்தேனோ?

          *<>*<>*

மணிவா சகரின் வார்த்தையிலே*

 .. மனத்தைக் கொடுத்தேன் அதன்விளைவாய்த்

தணியாத் தாகம் உனையடையத்

.. தகுதி யின்றும் உள்தோன்ற

அணியார் பொன்னம் பலத்தரசே

.. அடியேன் உன்முன் அழுதுநின்றேன்

பணிவோர்க் கருளும் பரம! என்பால்

.. பார்வை செலுத்தின் பழியாமோ?

(* “வினையேன் அழுதால் உன்னைப் பெறலாமே” - திருவாசகம்)

,.. அனந்த்  2-7-2020 பிரதோஷ நன்னாள்