சிற்றம்பலப் பழம்

<> சிற்றம்பலப் பழம் <>



திருச்சிற்றம்பலம்
 ​
கற்றைச் சடையா!  கனலார் நிறத்தா!
…காதார் குழையழகா!
……கடிமா மலர்பூண் உமையாள் பாகா!
………கணங்கட் கோர்தலைவா!

ஒற்றைத் தனியாய் உருவில் பலவாய்
…உலவும் முழுமுதல்வா!
……ஊனாய் ஊனுள் உயிராய் உறையும்
……….ஒருவா! மாலயனும்

முற்றும் அறியாப் பரமா! முன்னம்
….முனிவர் முன்னிலையில்
……மோனம் பயின்ற குரவா! மறையின்
………முடிவே! தாளிணையைப்

பற்றிப் பிடித்த அடியார்க் கருளும்
…. பரிவே! சிறந்தபெரும்
பற்றப் புலியூர்ச் சிற்றம்பலத்துப்
…. பழமே! பேரருளே!

(பழமே = பழமையானவனே)

அனந்த் 19-11-2014