பரதேசி

இன்று பிரதோஷ நன்னாள்.

திருச்சிற்றம்பலம்

<> பரதேசி <>

நானோர் பரதேசி – பல

.. நாடெல்லாம் சுற்றியென் நாட்களைப் போக்கும்  (நானோர்)

ஏனோ கவலையில்லை – என்றன்

.. ஈசனும் என்னைப்போல் ஊர்சுற்றி ஆவான்

தானொரு மாடேறித் – தன்

.. தாரம் மனையைத் துறந்து திரிவான்

ஊனார் தலையோட்டில் – தன்   

.. ஊணைப் பலர்இல் இரந்து புசிப்பான்

கானொரு மேடையென்று – தன்

.. காலொன்றைத் தூக்கி நடனமும் செய்வான்

   

மானோர் கரமேந்தி – அந்த

.. வாகில் அடியாரைத் தன்வசம் ஈர்ப்பான்

வானோர் அதைக்காணத் – தலை

.. வாசலின் முன்வந்து காத்துக் கிடப்பார்

கோனாய்ப் பொதுவெளியில் – ஒரு

.. கூத்தாடி ஏராளம் கூட்டத்தைச் சேர்ப்பான்

மோனம் பயின்றவண்ணம் – தவ

.. முனிவர்க்குச் சாடையில் ஏதோ மொழிவான்

நானுமிங்(கு) ஆங்கவன்போல் – ஒரு

.. நாடக மேடை உலகெனக் கொண்டு

வான்தீ வளிநீரும் - மண்ணும்

.. வார்க்கும் பலவான மாற்றங்கள் ஊடே

நானார் எனஅறியும் – அந்த

.. ஞானத்தை ஈய அவனருள் வேண்டிச்

சோணா சலத்தினிலே – என்றும்
​.. சும்மா இருந்தென்றன் காலங் கழிப்பேன் (நானோர்..)

.. அனந்த் 14-1-2018 (பிரதோஷம், திருவண்ணாமலை)