இன்று பிரதோஷ நன்னாள்.
திருச்சிற்றம்பலம்
<> சந்தையில் ஆடும் சிவன்
<>
சத்தமிகு சந்தையிலே ஆடிநிற்கும் ஐயாநீ
நித்தமும் ஆடும் நியதியைப்பேய் - கத்துகின்ற
வெங்காட்டில் காட்டிப்பின் விண்விஞ்சும் தில்லையாம்
அங்காடிக் காட்டிடுவாய் ஆர்த்து.
{சந்தை= சத்தம் = ஒலி, ஏழு (சப்தம்); வேத ஒலிகளையும்,அவற்றில் உள்ள ஏழுவகைச் சந்தத்தையும் குறிக்கும் (காயத்ரி, உஷ்ணிக், அனுஷ்டுப், ப்ருகதி, பங்க்தி, த்ருஷ்டுப், ஜகதி) musical flow,
rhythmic movement of verse; 2. vedic prosody; 3. the veda; 4. stanza;
verse. சந்தை = (கழக அகராதி: கடைவீதி; வேதம் ஓதும் இடம்; அடியார்கள்
எழுப்பும் ஓசை நிரம்பிய பொன்னம்பலத்தையும் குறிப்பதாகக் கொள்ளலாம்); வெங்காடு = வெம்காடு, சுடுகாடு; அங்காடி = அங்குஆடி; ஆர்த்து = ஒலி எழுப்பிக்கொண்டு}
....... அனந்த் 12/13-11-2024
இன்று சோமவாரப் பிரதோஷ நன்னாள்.
திருச்சிற்றம்பலம்
<> அவன் கருணை <>
பாரோர் இகழும் புழுவொன்று
… பரமன் உறையும் பனிமலைமேல்
ஏற முயன்று முடியாமல்
.. இளைத்துக் களைத்து விழுந்தரு
கூற வியலாக் கருணையுடன்
… குருவின் கரங்கள் தாங்கிரணம்
ஆறச் செய்து சிகரத்தில்
.. அமர்த்தி வைத்த அருளென்னே!
..அனந்த் 28-10-2024
இன்று சோமவாரப் பிரதோஷ நன்னாள்.
திருச்சிற்றம்பலம்
<> வந்திப்பேனே <>
தத்தித்தா மென்னத்தான் தாளந்தான் சேர்த்துத்தான் ஆடுங் காலை
சத்தித்தான் சாடித்தான் பார்த்துப்பின் தோற்றுத்தான் போக வைத்தோய்!
பத்தித்தான் நித்தந்தான் பண்ணித்தான் மண்ணில்தான் பாவி யேனும்
முத்தித்தான் கிட்டத்தான் முந்தித்தான் உன்னைத்தான் வந்திப்பேனே!
.... அனந்த் 29-9-2024
இன்று பிரதோஷ நன்னாள்.
திருச்சிற்றம்பலம்
பன்னலமும் வாய்ந்துதிகழ் மெய்யடியார்
… பலரிருக்கப் பிழைமலிந்த
புன்மதியேன் தன்னையுமோர் பொருளாக்கிப்
… புவிவாழ்வின் நிலையில்லாத்
தன்மையையான் உணரவைத்துத் தலைவநின்றன்
… தாளிணைக்கீழ் நிற்கவைத்தாய்
அன்னையினும் மேலானோய் அம்பலத்தில்
… அடியவர்முன் ஆடுமையே.
…… அனந்த் 15-9-2024
உண்டுடுத் துறங்கி உலகினில் உழன்றிங்(கு)
.. ஒடுங்கவோ நாயினேன் பிறந்தேன்?
கண்டதே மெய்யாய்க் கருதிவாழ்ந் தலந்தேன்
.. கயவர்தம் கூட்டிலே உழன்றேன்
பண்டுநாள் என்போல் பாவியர் தமக்குப்
.. பரிந்துநீ அருளிய தறிந்தேன்
தண்டனிட் டின்றுன் தாளினில் விழுந்தேன்
.. தள்ளிடின் உயிர்தரிக் கிலனே.
(அலந்தேன் = வருந்தினேன்.)
…… அனந்த் 30/31-8-2024
இன்று பிரதோஷ நன்னாள்.
திருச்சிற்றம்பலம்
<> விந்தை புரிவாய் <>
கல்லேன்யான் ஆயினும்பொய் சொல்லேன் உனைவழுத்த
வல்லேன்யான் அல்லேன்உன் அடியிணைக்கீழ் வந்துநின்றேன்
*கல்லானை தனையன்று கரும்புண்ணச் செய்தோயிப்
பொல்லேனின் பிழைபொறுத்துன் அடியாருள் புகுத்துவையே.
(*இது ஆலவாய் நகரில் சிவபெருமான் நிகழ்த்திய அறுபத்துநான்கு திருவிளையாடல்களில் ஒன்று.)
கையாலா காதஇக் கடையேனுன் திருப்பாதம்
கையாலே பற்றினேன் காவாயோ வந்தென்னை?
கையாலே அருள்காட்டிக் கனகசபை தனிலாடும்
ஐயாநீ ஆளாயேல் ஆருள்ளார் புகல்வாயே.
.... அனந்த் 31-7-2024/ 1-8-2024
இன்று பிரதோஷ நன்னாள்.
திருச்சிற்றம்பலம்
<> சேவகம் அருள்வாய் <>
ஏவிய கணையை யொத்தென் இருவினைப் பயன்கள் என்னை
மேவியென் நடப்பின் போக்கை விதித்திடுங் காலை உன்னைக்
கூவிநான் அழைத்தென் கையைக் குவித்துனைப் போற்றிப் பாடுஞ்
சேவகம் அருளாய் எற்குத் தில்லைதே வாதி தேவே.
(கூவிளம் புளிமா தேமா கருவிளம் புளிமா தேமா; விதித்தல் = உண்டாக்கல், நியமித்தல்,.. )
*****************
<> வீடடையும் வழி <>
உதைபந்து போல உலகிலடி பட்டு
வதையுற்று வாடிய வேளை - சிதைமலிந்த
காடதனில் ஆடிடும் காலடியைச் சுட்டினான்
வீடடையும் மார்க்கமீ தென்று.
*****************
... அனந்த் 18/19-7-2024
திருச்சிற்றம்பலம்
<> விளக்கிடுவாய் <>
….. அனந்த் 2-7-2024
