இன்று தமிழ்ப் புத்தாண்டுப் பிறப்புடன் சேர்ந்த பிரதோஷச் சிறப்பு நன்னாள்.  

                         திருச்சிற்றம்பலம்

                     

                <> நிம்மதி நிலவிட அருள் <>

 

            

 

                  <> நிம்மதி நிலவிட அருள் <>

 

உலகெங்கும் போர்புரிய உறுதிகொண்ட அரசினரின்

.. உறுமலும் அதுவிளைக்கும் உற்பாத மும்காணும்

நிலைமையுள்ள இந்நாளில் நீதியினை நிலைநாட்டி

.. நிம்மதியை நிலவிடச்செய் நேசமிகு ’பராபவ’த்தில்*

கலகமெலாம் தீர்ந்தொழிந்து காசினியோர் களிப்பெய்தக்

.. கனகசபை நடுவிலெழில் நாட்டியமொன் றா(டு)ஈசா

அலைகளெல்லாம் ஓய்ந்துன்றன் அடர்சடையுள் அடங்கிடு(ம்)அவ்

.. வான்நதிபோல் உன்னுள்ளே அடங்கிடநீ அருள்வாயே.

                          .. அனந்த் 14-4-2024

(பராபவத்தில் - -> இது பராபவம் என்னும் பெயர் கொண்ட தமிழ்ப் புத்தாண்டைக் குறிப்பது; வான்நதி -> ஆகாச கங்கை)