கூத்தாடும் ஐயன்

இன்று (22-5-2013) பிரதோஷ நன்னாள்

திருச்சிற்றம்பலம்

<>  கூத்தாடும் ஐயன் <>

கூத்தாடும் ஐயன்பேர் சொல்வோம்  -  அவன்

.........அடியவ ரோடே

கூடிமெய்ப் பாதையில் செல்வோம் - அவர்

.........துணையுடன் நம்மைக்  

கூடும்வல் வினையெல்லாம் வெல்வோம்                             1

ஆத்தாளை அங்கமாய்க் கொண்டான் - அவள்

..........கருணையி னாலே

ஆலம் அமுதென உண்டான் - அவன்

..........வடிவினை இங்கே

ஆர்தாம் முழுதுமாய்க் கண்டார்?                                               2

தாத்தைஎன் றாடுவான் தில்லை – அவன்

..........தாள்பணி வோர்தமைச்

சாராது ஊழ்தரும் தொல்லை. – அவர்

..........செல்லும் வழிக்கினிச்

சதிராடும் மன்றமே எல்லை.                       3

வார்த்தைக் கடங்கா ஆட்டந்தான்– அதை 

..........மாந்திட ஆங்கே

வருமாம் அடியார் கூட்டந்தான் - நடம்       

..........கண்ட அவர்க்கு

வருமோவே றெதிலும் நாட்டந்தான்?               4

கூத்தாடும் ஐயன்சொல் வேதம்  -  அவன்

..........குரைகழல் நாதம்

கூட்டும்ஓங் காரமாம் கீதம் – அதில்

..........கூடியே காண்போம்

கூறும் தரமில்லா போதம்.                         5

அனந்த் 22-5-2013

(போதம் = மெய்ஞ்ஞானம்)

யாப்பு: காவடிச்சிந்து வகை (இயைபு எதுகை, முடுகு)

முகப்பு ஓவியம்: சு. ரவி (நன்றியுடன்)

ஒலிப்பதிவு. ராகமாலிகை (ஆனந்தபைரவி, கமாஸ், ஷண்முகப்ரியா, சுருட்டி இராகங்கள்) தாளம்: ஆதி. 
http://raretfm.mayyam.com/ananth/kooththAdum.mp3