<> எல்லாம் ஆனவன் <>

இன்று சோமவாரப் பிரதோஷச் சிறப்பு நன்னாள்.

திருச்சிற்றம்பலம்

<> எல்லாம் ஆனவன் <>

விண்ணூரும் விடையான்என்
எண்ணூரும் இறையோன்முக்
கண்ணாரும் கடவுள்நற்
பண்ணாரும் பதியானே      1
       
பதியாவான் பத்தர்க்குக்
கதியாவான் கருணைபாய்
நதியாவான் நல்லோர்வாய்த்
துதியாவான் தூயவனே      2


தூயவனாம் தொழுவோர்க்குத்
தாயவனாம் சாருமுளம்
மேயவனாம் மறையறியா
மாயவனாம் வரையோனே   3


வரைதனை அசைத்தோனைத்
தரைமிசை அடர்த்தோனோர்
நரைவிடை நயந்தோன்பூ
விரைகமழ் கழலோனே      4


கழலடி துணையென்று
விழுபவர் துயர்தீர்ப்போன்
அழலொரு விழிகொண்ட
பழையதொர் பரமாமே.      5


பரந்ததொர் சடையான்நல்
உரந்திகழ் விடையான்மான்
கரந்தனில் உடையான்இல்
இரந்துணும் இறையாமே     6


இறைஞ்சிடும் அடியார்க்குக்
குறைந்திடா தருள்வோன்உள்
மறைந்தென துணர்வாக
நிறைந்துள குருநாதன்.      7


நாதமே உருவானோன்
வேதமுட் கருவானோன்
காதலோ டவன்நாமம்
ஓதுவோர் வினைதீர்ப்பான்    8


தீர்த்தமும் மதிபாதி
சேர்த்தமா முடியோன்ஓர்
வார்த்தையும் உரையாத
மூர்த்தியாம் குருவாவான்    9


ஆவினைந் துகந்தேற்பான்
காவென அடியார்கள்
கூவிடின் வருவானென்
பாவினுள் உறைவோனே.    10


(பாடல் 1. எண் = எண்ணம், மனம்; ஆர்தல்= அடைதல், பெறுதல், அனுபவித்தல், அணிதல். பாடல் 4. விரை = மணம், மலர், கலவைச் சாந்து)
யாப்பு: வஞ்சித்துறை அந்தாதி.


... அனந்த் 6-5-2013