இன்று சோமவாரப் பிரதோஷச் சிறப்பு நன்னாள்.
திருச்சிற்றம்பலம்
<> இச்சை இல்லான் <>
இச்சை யில்லான் எனக்காட்ட
.. இல்லந் தோறும் எழுந்தருளிப்
பிச்சை இரக்கும் பெம்மானே
.. பிரியா துன்றன் மேனியுறை
பச்சை நிறத்தாள் முன்னமிட்ட
.. பிச்சை போன விதமென்னே?
நச்சை உண்ட நாதாஉன்
.. நடிப்பின் பொருளார் அறிவாரே!
…… அனந்த் 22/1/2024
இன்று பிரதோஷ நன்னாள்.
திருச்சிற்றம்பலம்
பார்க்குமிட மெங்கு(ம்)நீ பரந்தொளிர் பாங்கினைப்
….. பாவியேன் அறிந்தி டாமல்
நீர்க்குமிழி அன்னவிவ் வாழ்க்கையை முற்றிலும்
… நிலையென நிற்றல் நோக்கி
ஆர்த்திடுபொற் சிலம்புட(ன்) ஐயநீ தில்லையில்
… ஆடிடும் அழகு காட்டி
ஈர்த்தெனைநீ ஆட்கொள ஈதுநற் றருணமாய்
… எண்ணில்யான் உய்வன் அன்றே.
(எழுசீர்க் கழிநெடிலடி ஆசிரிய விருத்தம்.)..
.... அனந்த் 8/9-1-2024
